ଆପ ସାଂସଦ ସଂଜୟ ସିଂଙ୍କୁ ଧକ୍କା, ଦିଲ୍ଲୀ ହାଇକୋର୍ଟରୁ ମିଳିଲାନି ଜାମିନ

ନୂଆଦିଲ୍ଲୀ: ମଦ ଦୁର୍ନୀତି ମାମଲାରେ ଦିଲ୍ଲୀ ହାଇକୋର୍ଟ ଆପ୍ ସାଂସଦ ସଞ୍ଜୟ ସିଂହଙ୍କୁ ପୁଣି ଝଟକା ଲାଗିଛି । ଦିଲ୍ଲୀ ହାଇକୋର୍ଟ ସଞ୍ଜୟ ସିଂହଙ୍କ ଜାମିନ ଆବେଦନଖାରଜ କରିଛନ୍ତି। ଜାନୁଆରୀ ୩୧ରେ ଦିଲ୍ଲୀ ହାଇକୋର୍ଟ ସଞ୍ଜୟ ସିଂହଙ୍କ ଜାମିନ ଆବେଦନ ଉପରେ ରାୟ ସଂରକ୍ଷିତ ରଖିଥିଲେ। ଇଡି ଅକ୍ଟୋବର ୪ରେ ସଞ୍ଜୟ ସିଂହଙ୍କୁ ଗିରଫ କରିଥିଲା।

ଜଷ୍ଟିସ ସ୍ୱର୍ଣ୍ଣକାନ୍ତ ଶର୍ମା କହିଛନ୍ତି ଯେ ମାମଲାର ଏହି ପର୍ଯ୍ୟାୟରେ ଅଭିଯୁକ୍ତ ସଞ୍ଜୟ ସିଂହଙ୍କୁ ଜାମିନ ଦେବାର କୌଣସି ଆଧାର ନାହିଁ। ଦିଲ୍ଲୀ ହାଇକୋର୍ଟ କହିଛନ୍ତି ଯେ ଆମେ ନିମ୍ନ ଅଦାଲତକୁ ଶୁଣାଣି ତ୍ୱରାନ୍ୱିତ କରିବାକୁ ନିର୍ଦ୍ଦେଶ ଦେଉଛୁ। କୌଣସି ପକ୍ଷ ଅନାବଶ୍ୟକ ମୁଲତବୀ ଦାବି କରିବେ ନାହିଁ ବୋଲି କୋର୍ଟ କହିଛନ୍ତି। ଅଦାଲତଙ୍କ ରାୟର ବିସ୍ତୃତ କପିକୁ ଅପେକ୍ଷା କରାଯାଇଛି।

ତଦନ୍ତକାରୀ ଏଜେନ୍ସି ଜାମିନ ଆବେଦନକୁ ବିରୋଧ କରି ଯୁକ୍ତି ଦର୍ଶାଇଛି ଯେ ସଞ୍ଜୟ ସିଂହ ଦିଲ୍ଲୀ ମଦ ଦୁର୍ନୀତିରୁ ସୃଷ୍ଟି ହୋଇଥିବା ଅପରାଧର ଆୟ ହାସଲ, ରଖିବା, ଲୁଚାଇବା, ବଣ୍ଟନ କରିବା ଏବଂ ବ୍ୟବହାର କରିବାରେ ସମ୍ପୃକ୍ତ ଥିଲେ। ୨୦୨୧-୨୨ ବର୍ଷ ପାଇଁ ରାଜ୍ୟ ସରକାରଙ୍କ ଅବକାରୀ ନୀତି ପ୍ରଣୟନ ଓ କାର୍ଯ୍ୟକାରିତାରେ ଦୁର୍ନୀତି ହୋଇଥିବା ଅଭିଯୋଗ ହୋଇଥିଲା, ଯାହାକୁ ପରେ ପ୍ରତ୍ୟାହାର କରି ଦିଆଯାଇଥିଲା। ଉପରାଜ୍ୟପାଳ ଭିକେ ସକ୍ସେନାଙ୍କ ସୁପାରିସ ପରେ ସିବିଆଇ ଦୁର୍ନୀତି ଅଭିଯୋଗରେ ଏତଲା ରୁଜୁ କରିଥିଲା। ଅକ୍ଟୋବର ୪, ୨୦୨୩ରେ ଇଡି ଦ୍ୱାରା ଗିରଫ ହୋଇଥିବା ସିଂହ ଗତ ୩ ମାସରୁ ଅଧିକ ସମୟ ଧରି ହେପାଜତରେ ଅଛନ୍ତି ।