୩ ଗାଡ଼ି ପୋଡ଼ିଲେ ମାଓବାଦୀ
ମାଲକାନଗିରି, : -ମାଲକାନଗିରି ଜିଲା ସୀମାନ୍ତ ଛତିଶଗଡ଼ ରାଜ୍ୟ ବିଜାପୁର ଜିଲାରେ ଗତ ଏକ ମାସ ମଧ୍ୟରେ ମାଓବାଦୀମାନେ ଦୁଇଥର ଗାଡି ଜାଳିବା ସହ ଅନେକ ହିଂସାକାଣ୍ଡ ଘଟାଇଛନ୍ତି। ମଙ୍ଗଳବାର ବିଳମ୍ବିତ ରାତିରେ ପୁଣି ଜିଲାର ନାଏମଡ ଥାନା ଅଞ୍ଚଳରେ ୩ଟି ଗାଡି ପୋଡିଛନ୍ତି।
ନାଏମଡ ଥାନା ଅଞ୍ଚଳର ମିଙ୍ଗାଚାଲ ନଦୀରେ ବାଲି ପରିବହନକୁ ବିରୋଧ କରି ମାଓବାଦୀମାନେ ୩ଟି ଗାଡିରେ ନିଆଁ ଲଗାଇ ଦେଇଥିଲେ। ସମସ୍ତ ଗାଡି ପୋଡି ପାଉଁଶ ହୋଇଯାଇଛି। ଏ ସମ୍ପର୍କରେ ଖବରପାଇ ନାଏମଡ ପୋଲିସ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛି। ଏହି ଘଟଣା ପରେ ଗାଡି ମାଲକଙ୍କ ମଧ୍ୟରେ ପୁଣି ଆତଙ୍କ ଖେଳିଯାଇଛି। ଅନ୍ୟପଟେ ବସ୍ତର ଜିଲାର ଭୋପାଲପାଟଣା ଥାନା ଅନ୍ତର୍ଗତ ଜାତୀୟ ରାଜପଥର ଜଙ୍ଗଲ ନାକାଠାରୁ ରୁଦ୍ରାରାମ ପର୍ଯ୍ୟନ୍ତ ବହୁ ପରିମାଣର ଲିଫଲେଟ ପକାଇଛନ୍ତି। ଲିଫଲେଟରେ କରଣ୍ଡମ ଖଣି ବିରୋଧରେ ଲେଖାଯାଇଛି। ଧାନଗୋଲର କୁଚନୋର ଖଣି କମ୍ପାନୀକୁ କରଣ୍ଡୁମ ଖଣି ହସ୍ତାନ୍ତର କରିବାକୁ ମାଓବାଦୀମାନେ ଉକ୍ତ ଲିଫଲେଟରେ ନିନ୍ଦା କରିଛନ୍ତି। ପୁଞ୍ଜିପତିଙ୍କୁ ଖୁସି କରିବା ପାଇଁ ଆଦିବାସୀ ଅଞ୍ଚଳର ସମସ୍ତ ପ୍ରକାର ଖଣିଜ ସମ୍ପଦକୁ ଅତି କମ୍ ମୂଲ୍ୟରେ ବିକ୍ରି କରାଯାଉଛି। ଏହାକୁ ବନ୍ଦ କରାଯାଉ ବୋଲି ମଧ୍ୟ ଲିଫଲେଟରେ ଉଲ୍ଲେଖ ରହିଛି। ପୋଲିସ ଏହି ଲିଫଲେଟଗୁଡିକୁ ଜବତ କରଛି।