ଦେଶ ପାଇଁ ଜୀବନ ଦେବାକୁ ପ୍ରସ୍ତୁତ : ମମତା

କୋଲକାତା: ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଶନିବାର କହିଛନ୍ତି ଯେ କିଛି ଲୋକ ଘୃଣାର ରାଜନୀତି କରି ଦେଶକୁ ବିଭାଜନ କରିବାକୁ ଚେଷ୍ଟା କରୁଛନ୍ତି ଏବଂ ସେ ଦେଶ ପାଇଁ ନିଜ ଜୀବନବଳି ଦେବାକୁ ପ୍ରସ୍ତୁତ ଅଛନ୍ତି କିନ୍ତୁ ଦେଶକୁ ବିଭାଜନ ହେବାକୁ ଦେବେ ନାହିଁ । କୋଲକାତାରେ ଇଦ୍ ନମାଜ ପାଇଁ ଏକାଠି ହୋଇଥିବା ଲୋକଙ୍କ ସହ କଥାବାର୍ତ୍ତା କରି ମମତା ବାନାର୍ଜୀ ସେମାନଙ୍କୁ ଏକଜୁଟ ହେବାକୁ ଏବଂ ୨୦୨୪ ଲୋକସଭା ନିର୍ବାଚନରେ ଭାରତୀୟ ଜନତା ପାର୍ଟି (ବିଜେପି)କୁ ପରାସ୍ତ କରିବାକୁ ମଧ୍ୟ ଅନୁରୋଧ କରିଛନ୍ତି ।

ବିଜେପି ଦେଶର ସମ୍ବିଧାନ ପରିବର୍ତ୍ତନ କରିବାକୁ ଚେଷ୍ଟା କରୁଛି ବୋଲି ଅଭିଯୋଗ କରି ମମତା ବାନାର୍ଜୀ କହିଛନ୍ତି, ସେ ପଶ୍ଚିମବଙ୍ଗରେ ଏନଆରସି ଲାଗୁ କରିବାକୁ ଦେବେ ନାହିଁ ।

ତୃଣମୂଳ କଂଗ୍ରେସ ଅଭିଯୋଗ କରିଛି ଯେ କେନ୍ଦ୍ରୀୟ ଏଜେନ୍ସିମାନେ ରାଜନୈତିକ ଉଦ୍ଦେଶ୍ୟ ରଖି ତାଙ୍କ ଦଳ ଉପରେ କାର୍ଯ୍ୟ କରୁଛନ୍ତି। ବର୍ଷକ ଭିତରେ ଆମ ଦେଶରେ କିଏ କ୍ଷମତାକୁ ଆସିବ ତାହା ନିର୍ଦ୍ଧାରଣ ପାଇଁ ନିର୍ବାଚନ ହେବ। ଆମକୁ ପ୍ରତିଶ୍ରୁତି ଦିଅନ୍ତୁ ଯେ ଆମେ ଏକଜୁଟ ହୋଇ ବିଭାଜନକାରୀ ଶକ୍ତିବିରୋଧରେ ଲଢ଼ିବୁ। ଆଗାମୀ ନିର୍ବାଚନରେ ଆମେ ସମସ୍ତେ ତାଙ୍କୁ କ୍ଷମତାରୁ ବାହାର କରିଦେବୁ ତାହା ସୁନିଶ୍ଚିତ କରିବା ଉଚିତ। ଗଣତନ୍ତ୍ରକୁ ବଞ୍ଚାଇବାରେ ବିଫଳ ହେଲେ ସବୁ କିଛି ନଷ୍ଟ ହୋଇଯିବ।