ଭଗବାନ କାହିଁକି ଚୁପ୍ ରୁହନ୍ତି
ଗୋଟିଏ ମଣିଷ ସଙ୍ଗରେ କଥା ହେଲେ ସେ ଆମ କଥା ଶୁଣେ l ଦରକାର ପଡିଲେ ପ୍ରତିଉତ୍ତର ମଧ୍ୟ ଦିଏ l ମଣିଷ କଥା ଛାଡି l ଟିକେ ଇତର ଜୀବଜନ୍ତୁ କଥା ଚିନ୍ତା କଲେ l ଶୁଆ, କୁକୁର, ଛେଳି, ନେଉଳ, ବିରାଡ଼ି ଆଦି ଙ୍କୁ ଟିକେ ସ୍ନେହ ପ୍ରୀତି ପ୍ରଦାନ କରି ଡାକିଲେ ସେମାନେ ବି ପ୍ରତିକ୍ରିୟା ପ୍ରକାଶ କରନ୍ତି l ପାଖକୁ ଚାଲି ଆସନ୍ତି l ଦେହରେ ଘଷି ହୁଅନ୍ତି l କିନ୍ତୁ ଗଣେଶ, ସରସ୍ବତୀ, ହନୁମାନ, ବିଷ୍ଣୁ, ଶିବ ଆଦି ଦେବତାଙ୍କ ମନ୍ଦିରକୁ ଯାଇ ସେମାନଙ୍କୁ ପ୍ରାର୍ଥନା କଲେ ସେମାନେ କାହିଁକି ମଣିଷ ସହ କଥା ହୁଅନ୍ତି ନାହିଁ, ଚୁପ ରୁହନ୍ତି – ଏ ପ୍ରଶ୍ନ ଟି ଗୋଟିଏ ଯୁବକ ଙ୍କ ମନରେ ଘାରିଲା l କଣ କରିବ, କାହାକୁ ଏ କଥା ପଚାରିବ, କିଏ ଏହାର ଯଥାର୍ଥ ଉତ୍ତର ଦେବ – ଏ କଥା ଚିନ୍ତା କରି କରି ଯୁବକଟି ପହଂଚିଲେ ଏକ ପୂଜକଙ୍କ ନିକଟରେ l ଯୁବକଙ୍କ ଠାରୁ ଜିଜ୍ଞାସା ଟିକକ ଶୁଣି ସାରିବା ପରେ ପୂଜକ କହିଲେ – ମୁଁ ସିନା ଠାକୁରଙ୍କ ସେବା ପୂଜା କରୁଛି କିନ୍ତୁ ଏ ପ୍ରଶ୍ନଟି ବି ମୋ ମନରେ ବହୁଦିନ ହେଲା ଉଙ୍କି ମାରୁଛି l ଠିକ ଅଛି ଆଜି ଏ ପ୍ରଶ୍ନ ଇଶ୍ୱରଙ୍କୁ ପଚାରିବି l ହେ ଯୁବକ ! ତୁମେ କାଲିକି ଆସ l ଉତ୍ତର ଦେବି l
ପରଦିନ ସକାଳୁ ସକାଳୁ ଦେବନୀତି ପରେ ପରେ ପୂଜକ ପଚାରି ବସିଲେ – ହେ ଭଗବାନ ! ତୁମେ ଏମିତି ସବୁବେଳେ କେମିତି ଚୁପ ହୋଇ ବସି ପାରୁଛ? ମୁହଁ ଖୋଲୁନ କାହିଁକି??ସେବାକାରୀ ପୂଜକର କଥା ଶୁଣି ଭଗବାନ ହଠାତ୍ ପ୍ରକଟିତ ହୋଇ କହିଲେ – ଚୁପ୍ ହୋଇ ନ ବସିଲେ ମୁଁ ସଂସାର କାର୍ଯ୍ୟ କରି ପାରିବି ନାହିଁ। ତୁମେ କ’ଣ ଭାବୁଛ ଯେ, ଗୋଟିଏ ଜାଗାରେ ଚୁପ ହୋଇ ଘଣ୍ଟା ଘଣ୍ଟା ଧରି ବସି ରହିବା ଏକ ଛୋଟିଆ କାର୍ଯ୍ୟ ବୋଲି?
– ଏହାଠାରୁ ସହଜ ଓ ସରଳ କାର୍ଯ୍ୟ ଜଗତରେ ଆଉ କ’ଣ ଅଛି ପ୍ରଭୁ। ମୋତେ ଗୋଟିଏ ଦିନ ପାଇଁ ସେ ଦାୟିତ୍ୱ ପ୍ରଦାନ କରନ୍ତୁ l ଦେଖିବା କଣ ହେଉଛି l ପୂଜକ ଉତ୍ତର ଦେଲେ l ଭକ୍ତବତ୍ସଳ ଭଗବାନ ପୂଜକକୁ କହିଲେ, ଠିକ ଅଛି ତୁମ କାମନା ଅବଶ୍ୟ ପୂରଣ ହେବ l ତୁମେ ଆଜି ଦିନଟି ମୋ ଆସନରେ ବସ l ଆଜି ମନ୍ଦିରକୁ ବହୁତ ଭକ୍ତ ଆସିବେ l କିନ୍ତୁ, ସାବଧାନ ! କୌଣସି ପରିସ୍ଥିତିରେ ବି ମୁହଁ ଖୋଲିବ ନାହିଁ l ପୁରା ଚୁପ ରହିବ l ତା ପରେ ଜାଣିବ ଯେ ମୁଁ କାହିଁକି ସବୁବେଳେ ମୌନ ରୁହେ l
ଭଗବାନଙ୍କ ଆସନରେ ଚୁପ ହୋଇ ବସିଲେ ପୂଜକ l ମନ୍ଦିରକୁ ସେଦିନ ପ୍ରଥମେ ଜଣେ ଭକ୍ତ ଆସିଲେ l ପ୍ରଥମ ଭକ୍ତ ଟି ମନ୍ଦିର ହୁଣ୍ଡୀ ରେ ଲକ୍ଷେ ଟଙ୍କା ପକାଇବା ବେଳେ ତାହା ଭୁଲରେ ହୁଣ୍ଡୀ ତଳେ ଯାଇ ପଡିଲା। ଭକ୍ତଟି ଫେରି ଯାଉଥିବା ବେଳେ ପୂଜକର ଇଚ୍ଛା ହେଉଥିଲା ଯେ ସେ ଭକ୍ତଟିକୁ ଡାକି ତଳେ ପଡି ଯାଇଥିବା ତା ଅର୍ଥ ବାବଦରେ କହିବ ବୋଲି କିନ୍ତୁ ତାକୁ ଚୁପ ରହିବା ପାଇଁ କୁହା ଯାଇଥିବାର କଥା ମନେ ପକାଇ ସେ ନିରବ ରହିଲେ l
କିଛି ସମୟ ପରେ ଦ୍ୱିତୀୟ ଜଣେ ଭକ୍ତ ଆସିଲେ l ସେ ହୁଣ୍ଡୀ ରେ ଟଙ୍କା ଟିଏ ପକାଇ ଦେଇ ଏଡ଼େ ପାଟିରେ କହିଲl – ପ୍ରଭୁ ! ମୋର ଆଜି ଲକ୍ଷେ ଟଙ୍କା ଦରକାର l ମୋତେ ଦିଅନ୍ତୁ l
ମାତ୍ର ଟଙ୍କାଟିଏ ଦେଇ ଲକ୍ଷେ ମାଗୁଥିବାର ଶୁଣି ପୂଜକର ରକ୍ତ ଗରମ ହୋଇଗଲେ ବି ସେ ଚୁପ ରହିଲେ l ଏଣେ ଏ ଦ୍ୱିତୀୟ ଭକ୍ତ ଜଣକ ଠାକୁରଙ୍କୁ ମୁଣ୍ଡିଆ ମାରୁଥିବା ବେଳେ ହୁଣ୍ଡୀ ତଳେ ପଡ଼ିଥିବା ଲକ୍ଷେ ଟଙ୍କା ପାଇ ଢେର ଖୁସି ହୋଇ ‘ଆଜି ପ୍ରଭୁ ମୋ ଡାକ ଶୁଣିଲେ’ ବୋଲି କହି ଖୁସିରେ ଲମ୍ବା ପାହୁଣ୍ଡ ପକାଇ ବାହୁଡ଼ିଲା l ପୂଜକ ଏସବୁ ଦେଖି ମନେ ମନେ ସେ ଲୋକଟି ଉପରେ କ୍ରୁଦ୍ଧ ହେଉଥିଲେ ବି ସର୍ତ୍ତ ଅନୁସାରେ ଚୁପ ରହିଲେ l
କିଛି ସମୟ ପରେ ତୃତୀୟ ଭକ୍ତ ନିଜ ପରିବାର ସହ ନାନାଦି ପ୍ରକାର ଭୋଗ ରାଗ ଧରି ଆସିଲେ l ସେ କିଛି ସମୟ ଧରି ପୂଜାର୍ଚ୍ଚନାରେ ଲାଗି ରହିଲେ l ରାତି ପାହିଲେ ଏଇ ତୃତୀୟ ଭକ୍ତ ଦୀର୍ଘ ଦିନ ପାଇଁ ଜଳଯାତ୍ରା ରେ ଯିବାର ଥିବାରୁ ସେ ଏବଂ ତାଙ୍କ ପରିବାର ଏକ ସୁଖଦ ଯାତ୍ରା ନିମନ୍ତେ ପ୍ରାର୍ଥନା କରି ମନ୍ଦିର ଛାଡିଲେ lଏଇ ସମୟ ମଧ୍ୟରେ ମନ୍ଦିରର ଜଣେ କର୍ମକର୍ତ୍ତା ହୁଣ୍ଡୀକୁ ଖୋଲି ଲକ୍ଷେ ଟଙ୍କା ନେବା ପାଇଁ ଚାହିଁଲେ l କାରଣ ସେତେବେଳେକୁ ପ୍ରଥମ ଭକ୍ତ ଜଣକ ଲକ୍ଷେ ଟଙ୍କା ଦାନ କରିଛି ବୋଲି ପ୍ରଚାରିତ ହୋଇ ସାରିଥାଏ। କିନ୍ତୁ ହୁଣ୍ଡୀରୁ ଆବଶ୍ୟକ ଟଙ୍କା ନ ମିଳିବାରୁ ସେ ସ୍ଥାନୀୟ ପୁଲିସକୁ ଖବର ଦେଲେ l ପୁଲିସ ତୁରନ୍ତ ପହଂଚି ସନ୍ଦେହରେ ତୃତୀୟ ଭକ୍ତକୁ ଗିରଫ କରି ନେଇ ଯାଉଥିବା ସମୟରେ ଭଗବାନଙ୍କ ଆସନରେ ବସିଥିବା ପୂଜକ ଆଉ ଚୁପ ହୋଇ ବସି ପାରିଲେ ନାହିଁ l ଦ୍ୱିତୀୟ ଭକ୍ତଟି ଲକ୍ଷେ ଟଙ୍କା ନେଇଛି ବୋଲି କହିବାରୁ ତୃତୀୟ ଭକ୍ତକୁ ଛାଡି ପୋଲିସ ଦ୍ୱିତୀୟ ଭକ୍ତଠୁଁ ସେତକ ଟଙ୍କା ଉଦ୍ଧାର କରି ତାକୁ ହାଜତକୁ ପଠାଇଦେଲl l
ତା’ ପର ଦିନ ଭଗବାନ ପୂଜକକୁ ନିଜ ଅନୁଭବ ବାବଦରେ ପଚାରିବାରୁ ପୂଜକ ବେଶ୍ ଖୁସି ହୋଇ ତୃତୀୟ ଭକ୍ତକୁ ପୁଲିସ କବଳରୁ ଉଦ୍ଧାର କରି ଦ୍ୱିତୀୟ ଚୋର ଭକ୍ତକୁ ଦଣ୍ଡ ଦେବା ପ୍ରସଙ୍ଗ କଥା ବେଶ୍ କୃତ୍ୟ କୃତ୍ୟ ହୋଇ ବର୍ଣ୍ଣନା କଲେ l ଭଗବାନ କହିଲେ, ରେ ମୂର୍ଖ ପୂଜକ! ତୁ କ’ଣ କଲୁ !!
ପ୍ରଥମ ଭକ୍ତଟି ଥିଲା ଚୋର l ସେ ଯାହା ଚୋରୀ କରେ ଅଧା ମୋତେ ଦିଏ l ଦ୍ୱିତୀୟ ଭକ୍ତର ସ୍ତ୍ରୀ ଅପରେସନ ପାଇଁ ଲକ୍ଷେ ଟଙ୍କା ଦରକାର ଥିଲା l ଲକ୍ଷେ ଟଙ୍କା ସେ ନେଇଥାନ୍ତା l ତୋ’ ଭୁଲ ପାଇଁ ସେ ଏବେ ଜେଲ୍ ରେ l ତା’ ରୋଗାକ୍ରାନ୍ତ ସ୍ତ୍ରୀ ଡାକ୍ତରଖାନା ଖଟିଆରେ ଏବେ ଛଟପଟ ହେଉଛି l ତୃତୀୟ ଭକ୍ତ ଜଣକ ସନ୍ଦେହରେ ଜେଲ ଯାଇଥିଲେ ଭଲ ହୋଇଥାନ୍ତା l ତା’ ଜୀବନ ସୁରକ୍ଷିତ ରହିଥାନ୍ତା l ଏବେ ସମୁଦ୍ରରେ ସୁନାମି। ତା’ ଜାହାଜଟି ଓଲଟି ଯିବା ଉପରେ l ମରଣ ସହିତ ଏବେ ସେ ସଂଗ୍ରାମ ରତ l
ଏସବୁ ଶୁଣି ପୂଜକର ହୋସ ଉଡ଼ିଗଲା l କିଛି ସମୟ ପରେ ପୂର୍ବ ଦିନର ଜିଜ୍ଞାସୁ ଯୁବକ ଟି ଉତ୍ତର ପାଇବା ପାଇଁ ପହଂଚି ଯିବାରୁ ପୂଜକ ଜଣକ ଭଗବାନ ସବୁବେଳେ କାହିଁକି ଚୁପ ରୁହନ୍ତିର ମାର୍ମିକ ଉତ୍ତର ବତାଇ ଦେଲା l