ରିଲିଜ୍ ହେଲା ଫିଲ୍ମ ‘ଆଦିପୁରୁଷ’ର ଟ୍ରେଲର୍
ମୁମ୍ବାଇ: ‘ରାମାୟଣ’ କାହାଣୀ ଆଧାରିତ ତଥା ସାଉଥ୍ ସୁପରଷ୍ଟାର ପ୍ରଭାସ ଓ ବଲିଉଡ୍ ନାୟିକା କ୍ରିତି ସାନନଙ୍କ ଅଭିନୀତ ଫିଲ୍ମ ‘ଆଦିପୁରୁଷ’ ଏ ବର୍ଷର ବହୁ ପ୍ରତୀକ୍ଷିତ ଫିଲ୍ମ ମଧ୍ୟରୁ ଗୋଟିଏ । ଦର୍ଶକ ରାମାୟଣର କାହାଣୀକୁ ବଡ଼ ପରଦାରେ ଦେଖିବାକୁ ଖୁବ୍ ଉତ୍ସୁକ ଅଛନ୍ତି। ତେବେ ଏହି ଫିଲ୍ମ ପାଇଁ ଉତ୍ସୁକ ଥିବା ଦର୍ଶକଙ୍କ ପାଇଁ ଖୁସି ଖବର। କାରଣ ଫିଲ୍ମଟିର ଟ୍ରେଲର୍ ରିଲିଜ୍ ହୋଇଯାଇଛି। ରାମାୟଣ ଉପରେ ଆଧାରିତ ନିର୍ଦ୍ଦେଶକ ଓମ୍ ରାଉତ୍ଙ୍କ ଏହି ଫିଲ୍ମଟି ଆଗାମୀ ଜୁନ୍ ୧୬ ତାରିଖରେ ରିଲିଜ୍ ହେବ।
ଫିଲ୍ମଟିରେ ପ୍ରଭାସ ଭଗବାନ ରାମଙ୍କ ଚରିତ୍ରରେ ନଜର ଆସିଥିବା ବେଳେ ସୀତା ମାଆଙ୍କ ରୂପରେ ଦେଖିବାକୁ ମିଳିଛନ୍ତି କ୍ରିତି ସାନନ୍। ପ୍ରଥମ ଥର ପାଇଁ ପ୍ରଭାସ ଓ କ୍ରିତି ଏକତ୍ର ପରଦାରେ ଦେଖିବାକୁ ମିଳିବେ। ଫିଲ୍ମଟି ହିନ୍ଦୀ ବ୍ୟତୀତ ଆହୁରି ଅନେକ ଭାଷାରେ ବି ରିଲିଜ୍ ହେବ।
ଫିଲ୍ମଟିର ପ୍ରଥମ ପୋଷ୍ଟ୍ର ଗତ ରାମ ନବମୀରେ ରିଲିଜ୍ ହୋଇସାରିଛି। ତେବେ ଦ୍ବିତୀୟ ପୋଷ୍ଟର୍ ରିଲିଜ୍ ହୋଇଥିଲା ହନୁମାନ ଜୟନ୍ତୀରେ। ଭଗବାନ ଶ୍ରୀରାମଙ୍କ ସର୍ବୋଚ୍ଚ ଭକ୍ତ ବଜରଙ୍ଗବାଲୀଙ୍କୁ ରଖି ପୋଷ୍ଟ୍ର ରିଲିଜ୍ କରିଥିଲେ ନିର୍ମାତା। ପୋଷ୍ଟରରେ ଦେବଦତ୍ତ ନାଗେଙ୍କୁ ହନୁମାନଙ୍କ ଭୂମିକାରେ ନଜର ଆସିଥିଲେ । ହନୁମାନ ଜୟନ୍ତୀ ଅବସରରେ ନିର୍ମାତା ଏହି ପୋଷ୍ଟର୍ ରିଲିଜ୍ କରିଥିଲେ। ହନୁମାନଙ୍କ ଏହି ପୋଷ୍ଟର୍ରେ ଶକ୍ତି, ଦୃଢ଼ତା ଓ ନିଷ୍ଠାପରତାକୁ ଦର୍ଶାଯାଇଥିଲା।
ଆପଣ ଜାଣନ୍ତି ଯେ ‘ବାହୁବଳୀ’ ପରଠାରୁ ପ୍ରଭାସଙ୍କର ସେପରି କୌଣସି ଫିଲ୍ମ ବଡ଼ ହିଟ୍ ହୋଇନାହିଁ। ଏବେ ‘ଆଦିପୁରୁଷ’ର ଟ୍ରେଲର୍ ରିଲିଜ୍ ହେବା ପରେ ପ୍ରଶଂସକମାନ ଉତ୍ସାହର ସହିତ ଫିଲ୍ମଟିକୁ ଅପେକ୍ଷା କରିଛନ୍ତି।