୭୦ ବର୍ଷରେ ପାକିସ୍ତାନରେ ଧ୍ବଂସ ହେଲାଣି ୪୦୯ଟି ମନ୍ଦିର

ନୂଆଦିଲ୍ଲୀ : ପାକିସ୍ତାନର ୨୨ ଲକ୍ଷ ହିନ୍ଦୁ ନିଜର ଅସ୍ତିତ୍ବ ପାଇଁ ଲଢୁଛନ୍ତି । ମାତ୍ର ପାକିସ୍ତାନର ଏହି ସଂଖ୍ୟାଲଘୁମାନେ କାହା ନିକଟରେ ଅଭିଯୋଗ କରିବେ? ଏହି ଦେଶରେ ବସବାସ କରୁଥିବା ଲକ୍ଷ ଲକ୍ଷ ହିନ୍ଦୁଙ୍କ ପ୍ରତି ଯେଉଁ ଅନ୍ୟାୟ ହେଉଛି, ସେଥିରୁ ନ୍ୟାୟ ଆଶା କରିବା ବୃଥା କାରଣ ସରକାର ନିଜେ ହିନ୍ଦୁମାନଙ୍କୁ ହଇରାଣ କରିବାର କୌଣସି ସୁଯୋଗ ଛାଡିବାକୁ ଚାହୁଁନାହାନ୍ତି ଏବଂ ପାକିସ୍ତାନ ସରକାର ଏହାକୁ ପର୍ଯ୍ୟାୟକ୍ରମେ ପ୍ରମାଣିତ କରୁଛନ୍ତି । ଏହି ମନ୍ଦିର ହିନ୍ଦୁମାନଙ୍କ ଆସ୍ଥାର କେନ୍ଦ୍ର ଏବଂ ପାକିସ୍ତାନ ସରକାର ଏହି ଆସ୍ଥା କେନ୍ଦ୍ର ଉପରେ ଆକ୍ରମଣ କରନ୍ତି ।

ଦୁଇଦିନ ତଳେ କରାଚିରେ ନିର୍ମିତ ୧୫୦ ବର୍ଷ ପୁରୁଣା ହିନ୍ଦୁ ମନ୍ଦିରକୁ ଭାଙ୍ଗି ଦିଆଯାଇଛି। ରାତି ଅଧରେ ସମସ୍ତେ ଶୋଇଥିବା ବେଳେ ପାକିସ୍ତାନ ସରକାରଙ୍କ ନିର୍ଦ୍ଦେଶରେ ପ୍ରଶାସନ ହିନ୍ଦୁ ମନ୍ଦିରକୁ ଭାଙ୍ଗି ଦେଇଥିଲା। ଏହା ଥିଲା ମାତା ରାଣୀଙ୍କ ମନ୍ଦିର ଏବଂ ଏଠାକାର ଲୋକଙ୍କ ପାଇଁ ବିଶ୍ୱାସର ଏକ ବଡ଼ କେନ୍ଦ୍ର । ପାଖାପାଖି ୫୦୦ ବର୍ଗଫୁଟରେ ନିର୍ମିତ ଏହି ମନ୍ଦିର ବହୁତ ପ୍ରାଚୀନ । କୁହାଯାଏ ଏହି ମନ୍ଦିର ତଳେ ବହୁ ଧନ ଗଚ୍ଛିତ ରହିଛି । ଲୋକମାନେ କହୁଛନ୍ତି ଯେ ଏହି ମନ୍ଦିରକୁ ଜାଣିଶୁଣି ଭାଙ୍ଗି ଦିଆଯାଇଛି ଯାହା ଦ୍ୱାରା ଏହି ଜମି ବିଲଡରଙ୍କୁ ଦିଆଯାଇପାରିବ ।

ସେହିପରି ସିନ୍ଧ ପ୍ରଦେଶରେ ଏକ ହିନ୍ଦୁ ମନ୍ଦିର ଉପରେ ଅପରାଧୀମାନେ ରକେଟ ଲଞ୍ଚର ମାଡ଼ କରି ତାକୁ ଧ୍ବଂସ କରିଦେଇଛନ୍ତି । ଏହା ଫଳରେ ହିନ୍ଦୁମାନେ ଆତଙ୍କରେ ଅଛନ୍ତି ।