ହରମନପ୍ରୀତଙ୍କ ଉପରେ କଟକଣା ଲଗାଇଲା ଆଇସିସି

ନୂଆଦିଲ୍ଲୀ: ଭାରତୀୟ ମହିଳା କ୍ରିକେଟ୍ ଦଳର ଅଧିନାୟିକା ହରମନପ୍ରୀତ କୌରଙ୍କ ବିରୋଧରେ ଅନ୍ତର୍ଜାତୀୟ କ୍ରିକେଟ୍ ପରିଷଦ (ଆଇସିସି) କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଶନିବାର ବାଂଲାଦେଶ ବିପକ୍ଷ ମ୍ୟାଚରେ ଆଉଟ୍ ହେବା ପରେ କ୍ରୋଧ ପ୍ରକାଶ କରିବା ଏବଂ ମ୍ୟାଚ୍ ପରେ ଅମ୍ପାୟାରଙ୍କ ସହ ଅସଦାଚରଣ କରିଥିବାରୁ ତାଙ୍କୁ ଦୁଇଟି ମ୍ୟାଚ୍ ପାଇଁ ନିଷିଦ୍ଧ କରାଯାଇଛି। ଏହି ଆକ୍ସନ ଯୋଗୁଁ ଏସିଆ କପର ପ୍ରାରମ୍ଭିକ ମ୍ୟାଚରେ ଭାରତୀୟ ଦଳକୁ ନିଜ ଅଧିନାୟକଙ୍କ ବିନା ଖେଳିବାକୁ ପଡିବ ।

ବାଂଲାଦେଶ ବିପକ୍ଷ ତୃତୀୟ ତଥା ଅନ୍ତିମ ଦିନିକିଆରେ ଆଉଟ୍ ହେବା ପରେ ହରମନପ୍ରୀତ କୌର ରାଗିଯାଇ ଷ୍ଟମ୍ପକୁ ବ୍ୟାଟ ଦ୍ବାରା ପିଟିଦେଇଥିଲେ। କ୍ରୀଡ଼ା ସାମଗ୍ରୀ ନଷ୍ଟ କରିବା ଏବଂ ଅମ୍ପାୟାରଙ୍କୁ ସମାଲୋଚନା କରିବା ଅଭିଯୋଗରେ ତାଙ୍କୁ ଦୁଇ ମ୍ୟାଚ୍ ପାଇଁ ନିଷିଦ୍ଧ କରାଯିବ। ଏହି ଦଣ୍ଡ ପରେ ସେ ଏସୀୟ କ୍ରୀଡ଼ାର ଉଦଘାଟନୀ ମ୍ୟାଚ୍ ଖେଳିପାରିବେ ନାହିଁ ବୋଲି ନିଷ୍ପତ୍ତି ନିଆଯାଇଛି।

ମ୍ୟାଚ୍ ସମୟରେ ହରମନପ୍ରୀତ କୌରଙ୍କୁ ବାଂଲାଦେଶ ବୋଲର ନାହିଦା ଅଖତର ଏଲବିଡବ୍ଲୁ ଆଖ୍ୟା ଦେଇଥିଲେ ମଧ୍ୟ ସେ ଦାବି କରିଥିଲେ ଯେ ବଲ୍ ତାଙ୍କ ବ୍ୟାଟ୍ ର ତଳ ଭାଗରେ ବାଜିଥିଲା। ଫିଲ୍ଡ ଅମ୍ପାୟାରଙ୍କ ଦ୍ୱାରା ବାଦ୍ ପଡ଼ିବା ପରେ ସେ ପ୍ୟାଭିଲିୟନ୍ ଫେରୁଥିବା ବେଳେ ଷ୍ଟମ୍ପ୍ ଉପରେ ନିଜର କ୍ରୋଧ ପ୍ରକାଶ କରିଥିଲେ। ସେ ଖୋଲାଖୋଲି ଭାବେ ଅମ୍ପାୟାରଙ୍କ ପ୍ରତି ନିଜର କ୍ରୋଧ ପ୍ରକାଶ କରିଥିଲେ।