ମଣିପୁର ହିଂସା: ସୁପ୍ରିମକୋର୍ଟ କ୍ଷୁବ୍ଧ
ନୂଆଦିଲ୍ଲୀ: ମଣିପୁର ହିଂସା ମାମଲାରେ ସୁପ୍ରିମକୋର୍ଟ ଆଜି ଉଭୟ କେନ୍ଦ୍ର ଏବଂ ମଣିପୁର ସରକାର ଉପରେ ବର୍ଷିଛନ୍ତି। ଦୁଇ ଜଣ ମହିଳାଙ୍କୁ ଦୁଷ୍କର୍ମ ପରେ ପରେଡ୍ କରାଯିବା ମାମଲାର ଶୁଣାଣି ବେଳେ ପ୍ରଧାନ ବିଚାରପତି ଜଷ୍ଟିସ ଡି.ୱାଇ. ଚନ୍ଦ୍ରଚୂଡ଼ ପୁଲିସ ପ୍ରତି କଠୋର ଆଭିମୁଖ୍ୟ ଗ୍ରହଣ କରିଛନ୍ତି। ଏହି ମାମଲାରେ ଅଭିଯୋଗ ମିଳିବାର ୧୪ ଦିନ କାଳ ପୁଲିସ କଣ କରୁଥିଲା ବୋଲି ପ୍ରଶ୍ନ କରିଛନ୍ତି। ଘଟଣା ମେ’ ୪ ତାରିଖରେ ଘଟିଥିବା ବେଳେ ପୁଲିସ ମେ’ ୧୮ ତାରିଖରେ ଏଫଆଇଆର ରୁଜୁ କରିଥିଲା। ଭିଡିଓ ଭାଇରାଲ ହେବା ପର୍ଯ୍ୟନ୍ତ ପୁଲିସ କଣ କରୁଥିଲା। ଉଭୟ କେନ୍ଦ୍ର ଏବଂ ମଣିପୁର ସରକାରଙ୍କୁ ୬ଟି ପ୍ରଶ୍ନ ପଚାରିବା ସହିତ ୨୪ ଘଣ୍ଟା ମଧ୍ୟରେ ଏସଂକ୍ରାନ୍ତ ରିପୋର୍ଟ ଦାଖଲ କରିବା ଲାଗି ନିର୍ଦେଶ ଦେଇଛନ୍ତି।ପଶ୍ଚିମ ବଙ୍ଗ, ଛତିଶଗଡ଼, ରାଜସ୍ଥାନ ଭଳି ରାଜ୍ୟରେ ମଧ୍ୟ ଏଭଳି ଦୁଷ୍କର୍ମ ଘଟୁଛି ବୋଲି ଜଣେ ଓକିଲ କୋର୍ଟଙ୍କ ଦୃଷ୍ଟି ଆକର୍ଷଣ କରିବାରୁ ପ୍ରଧାନ ବିଚାରପତି ଭୀଷଣ ବିରକ୍ତି ପ୍ରକାଶ କରି କହିଥିଲେ ଯେ ମଣିପୁରରେ େଯଉଁ ଘଟଣା ଘଟିଛି ତାହା ଅଭୂତପୂର୍ବ। ଏହାକୁ ଅନ୍ୟ ମାମଲା ସହିତ ତୁଳନା କରାଯାଇପାରିବ ନାହିଁ। ମଣିପୁର ମାମଲାର ଗୁରୁତ୍ବ ଦୃଷ୍ଟିରୁ ଏହାର ସେହି ହିସାବରେ ବିଚାର କରାଯିବାର ଆବଶ୍ୟକତା ରହିଛି। ମଣିପୁରରେ ହିଂସା ଆରମ୍ଭ ହେବା ଦିନ ଠାରୁ ୬ ହଜାର ମାମଲା ରୁଜୁ ହୋଇଛି। ତେବେ ଏଥିରେ କେତେ ମାମଲା ନାରୀ ହିଂସା ସହ ସଂପୃକ୍ତ, ସେ ସଂପର୍କରେ ସରକାରଙ୍କ ପାଖରେ ରିପୋର୍ଟ ନଥିବାରୁ କୋର୍ଟ ଉଦ୍ବେଗ ପ୍ରକାଶ କରି ଏଫଆଇଆର ସଂକ୍ରାନ୍ତରେ ବିସ୍ତୃତ ରିପୋର୍ଟ ମାଗିଛନ୍ତି। ଉକ୍ତ ଘଟଣାର ତଦନ୍ତ ସହିତ ହିଂସାରେ ବିସ୍ଥାପିତ ହୋଇଥିବା ବ୍ୟକ୍ତିଙ୍କ ପାଇଁ କ’ଣ ପଦକ୍ଷେପ ନିଆଯାଇଛି ତାହାର ବିସ୍ତୃତ ରିପୋର୍ଟ ମାଗିଛନ୍ତି। କୋର୍ଟ ଯେଉଁ ୬ଟି ପ୍ରଶ୍ନ କରିଛନ୍ତି ସେଥିରେ ରହିଛି: ମଣିପୁରରେ ହିଂସା ସଂକ୍ରାନ୍ତରେ ମୋଟ କେତେ ଏଫ୍ଆଇଆର ରୁଜୁ ହୋଇଛି। କି କି ପ୍ରକାରର ଏଫ୍ଆଇଆର ରୁଜୁ ହୋଇଛି। ଜିରୋ ଏଫ୍ଆଇଆର ମାମଲା କେତେ। ସେକସନ ୧୬୪ରେ କେତେ ଜଣଙ୍କ ବୟାନ ରେକର୍ଡ କରାଯାଇଛି। କେଉଁ ଥାନାକୁ କେତେ ମାମଲା ହସ୍ତାନ୍ତର ହୋଇଛି। ବର୍ତ୍ତମାନ ସୁଦ୍ଧା କେତେ ଜଣଙ୍କୁ ଗିରଫ କରାଯାଇଛି। ଗିରଫ ହୋଇଥିବା ଅଭିଯୁକ୍ତମାନଙ୍କ ଲାଗି ଆଇନଗତ ସହାୟତା ପ୍ରଦାନ ସ୍ଥିତି କ’ଣ? ଏସଂକ୍ରାନ୍ତ ୨୪ ଘଣ୍ଟା ଭିତରେ ରିପୋର୍ଟ ଦାଖଲ କରିବାକୁ ସର୍ବୋଚ୍ଚ ଅଦାଲତ ନିର୍ଦେଶ ଦେଇଛନ୍ତି।ଶୁଣାଣି ବେେଳ କୋର୍ଟ କହିଛନ୍ତି ଯେ ଭାଇରାଲ ହୋଇଥିବା ଭିଡିଓ କେବଳ ମହିଳାଙ୍କ ଉପରେ ହୋଇଥିବା ଆକ୍ରମଣର ଗୋଟିଏ ମାମଲା ନୁହେଁ। ଗୃହ ସଚିବଙ୍କ ଦ୍ବାରା ଦାଖଲ ହୋଇଥିବା ସତ୍ୟପାଠରୁ ସୂଚନା ମିଳୁଛି ଯେ ଏଭଳି ଏକାଧିକ ଅପରାଧ ହୋଇଛି। ମୈତେୟୀ ଏବଂ କୁକି ସଂପ୍ରଦାୟ ମଧ୍ୟରେ ମେ’ ୩ ତାରିଖରୁ ସଂଘର୍ଷ ଆରମ୍ଭ ହେବା ଦିନଠାରୁ ମହିଳାଙ୍କ ବିରୋଧରେ ହୋଇଥିବା ଆକ୍ରମଣ ମାମଲାରେ କେତୋଟି ମାମଲା ରୁଜୁ ହୋଇଛି ବୋଲି ପ୍ରଧାନ ବିଚାରପତି ଆଟର୍ଣ୍ଣି ଜେନେରାଲଙ୍କୁ ପଚାରିଥିଲେ। ଆବେଦନକାରୀଙ୍କ ପକ୍ଷରୁ ବରିଷ୍ଠ ଆଇନଜୀବୀ କପିଲ ସିବଲ ଯୁକ୍ତି ବାଢ଼ିଥିଲେ ଯେ ଉକ୍ତ ମାମଲା ସିବିଆଇକୁ ହସ୍ତାନ୍ତର କରିବା ପୀଡ଼ିତାମାନେ ଚାହାନ୍ତି ନାହିଁ। ଏପରିକି ମାମଲାକୁ ଅନ୍ୟ ରାଜ୍ୟକୁ ସ୍ଥାନ୍ତାନ୍ତର କରିବାକୁ ମଧ୍ୟ ଚାହାନ୍ତି ନାହିଁ। ଯେଉଁମାନେ ହିଂସା ଭିଆଇଥିଲେ ସେମାନଙ୍କ ସହିତ ପୁଲିସ ମିଳିମିଶି ରହିଛି। ନାଗରିକଙ୍କୁ ସୁରକ୍ଷା ଦେବାକୁ ଥିବା ପୁଲିସ ଓ ପ୍ରଶାସନ ଉପରେ ଆମର କିଭଳି ଆସ୍ଥା ରହିବ ବୋଲି ସିବଲ ଯୁକ୍ତି ବାଢ଼ିଥିଲେ। ତଦନ୍ତରେ ଯଦି କିଛି ପାତରଅନ୍ତର ଉପୁଜେ ତାହେଲେ ତାହାକୁ ଅନ୍ୟ ଏକ ସ୍ବାଧୀନ ଏଜେନ୍ସିକୁ ପ୍ରଦାନ କରାଯିବା ଆବଶ୍ୟକ ବୋଲି ସିବଲ ମତ ରଖିଥିଲେ। ତେବେ ସୁପ୍ରିମକୋର୍ଟ କହିଥିଲେ ସଂଘର୍ଷ ଉପୁଜିଥିବା ଏହି ରାଜ୍ୟରେ ମହିଳାଙ୍କ ବିରୋଧରେ ହିଂସାକୁ ରୋକିବା ପାଇଁ ଏକ ବ୍ୟବସ୍ଥା ବିକଶିତ କରାଯିବା ଆବଶ୍ୟକ।ଗତ ସପ୍ତାହ ସୁପ୍ରିମକୋର୍ଟରେ ଗୃହ ମନ୍ତ୍ରାଳୟ ପକ୍ଷରୁ ଅବଗତ କରାଯାଇଥିଲା େଯ ମଣିପୁରରେ ଯେଉଁ ଦୁଇ ମହିଳାଙ୍କୁ ଉଲଗ୍ନ କରି ପରେଡ କରାଯାଇଥିଲା ସେହି ମାମଲା ସିବିଆଇକୁ ହସ୍ତାନ୍ତର କରାଯାଇଛି। ସିବିଆଇ ଏବେ ଉକ୍ତ ମାମଲାକୁ ଆନୁଷ୍ଠାନିକ ଭାବେ ହାତକୁ ନେଇ ଏଫଆଇଆର ରୁଜୁ କରିଛି। ଏଥିସହିତ ଗୃହ ସଚିବ ଅଜୟ ଭାଲାଙ୍କ ଦ୍ବାରା ଏକ ସତ୍ୟପାଠ ଦାଖଲ ହୋଇଥିଲା। ଏକ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ନିଷ୍କର୍ଷରେ ପହଞ୍ଚିବା ପାଇଁ ମାମଲାକୁ ମଣିପୁର ରାଜ୍ୟ ବାହାରକୁ ସ୍ଥାନାନ୍ତର କରିବା ପାଇଁ ସେ ନିବେଦନ କରିଥିଲେ। ଉକ୍ତ ମାମଲାରେ ୭ ଜଣଙ୍କୁ ଗିରଫ କରାଯାଇଥିବା ସେ ସୂଚନା ଦେଇଥିଲେ।
ଦୁଇ ମହିଳାଙ୍କ ଦୁଷ୍କର୍ମ ଓ ପରେଡ ମାମଲାର ଭିଡିଓ ଜୁଲାଇ ୧୯ ତାରିଖରେ ଭାଇରାଲ ହୋଇଥିଲା। ପୁଲିସ ଏହି ଘଟଣାରେ ଏକ ଅପହରଣ, ଗଣଦୁଷ୍କର୍ମ ଏବଂ ହତ୍ୟା ମାମଲା ଥୋବାଲ ଜିଲ୍ଲାର ନଙ୍ଗପୋକ୍ ସେକମାଇ ଥାନାରେ ଦାଖଲ କରିଛି। ତେବେ ଜୁଲାଇ ୨୦ ତାରିଖରେ ସୁପ୍ରିମକୋର୍ଟ ଉକ୍ତ ଘଟଣାକୁ ସଂଜ୍ଞାନକୁ ନେଇଥିଲେ। ଉକ୍ତ ଭିଡିଓ ଗଭୀର ଭାାବେ ବ୍ୟଥିତ କରିଛି ବୋଲି କହିଥିଲେ। ଏକ ସାମ୍ବିଧାନିକ ଗଣତନ୍ତ୍ରରେ ହିଂସା ଭିଆଇବା ପାଇଁ ମହିଳାଙ୍କୁ ବ୍ୟବହାର କରିବା ସାଧାରଣତଃ ଗ୍ରହଣଯୋଗ୍ୟ ନୁହେଁ ବୋଲି ସୁପ୍ରିମକୋର୍ଟ କହିଥିଲେ। ସୂଚନାଯୋଗ୍ୟ ଯେ ଯେଉଁ ମହିଳାଦ୍ବୟଙ୍କୁ ଦୁଷ୍କର୍ମ କରାଯାଇ ପରେଡ କରାଯାଇଥିଲା ସେମାନେ ସୁପ୍ରିମକୋର୍ଟରେ ସାନି ପିଟିସନ ଦାଖଲ କରିଛନ୍ତି। ମେ’ ୪ ତାରିଖର ଯୌନ ଅପରାଧ ସଂକ୍ରାନ୍ତ ଏଫଆଇଆରରେ ପୀଡ଼ିତାମାନେ ସେମାନଙ୍କ ପରିଚୟ ଗୋପନ ରଖିବା ପାଇଁ ପୃଥକ ଆବେଦନ କରିଛନ୍ତି।