ରାଗରେ କମ୍ପିଲେ ପ୍ରଧାନ ବିଚାରପତି ଜଷ୍ଟିସ ଚନ୍ଦ୍ରଚୂଡ଼
ନୂଆଦିଲ୍ଲୀ: ସୁପ୍ରିମ୍କୋର୍ଟର ପ୍ରଧାନ ବିଚାରପତି ଜଷ୍ଟିସ୍ ଡି ଓ୍ଵାଇ ଚନ୍ଦ୍ରଚୂଡ଼ ଆଜି ନିଜ କୋର୍ଟରୁମ୍ ଭିତରେ ରାଗରେ ନିଜ ଉପରୁ ନିୟନ୍ତ୍ରଣ ହରାଇ କମ୍ପିଛନ୍ତି। ଓକିଲମାନଙ୍କ ଚାମ୍ବର ପାଇଁ ଜମି ଆବଣ୍ଟନ ମାମଲାରେ ପ୍ରଧାନ ବିଚାରପତି ଜଷ୍ଟିସ ଡିଓ୍ଵାଇ ଚନ୍ଦ୍ରଚୂଡ଼ ଓ ସୁପ୍ରିମ୍କୋର୍ଟ ବାର୍ ଆସୋସିଏସନ୍ (ଏସ୍ସିବିଏ)ର ସଭାପତି ବରିଷ୍ଠ ବିକାଶ ସିଂହଙ୍କ ମଧ୍ୟରେ ଗୁରୁବାର ତୀବ୍ର ଯୁକ୍ତିତର୍କ ହୋଇଥିଲା ଏବଂ ପ୍ରଧାନ ବିଚାରପତି ବରିଷ୍ଠ ଓକିଲଙ୍କୁ ଉଚ୍ଚସ୍ୱରରେ ‘ଚୁପ୍ ରହନ୍ତୁ, ବର୍ତ୍ତମାନ କୋର୍ଟ ଛାଡ଼ି ଦିଅନ୍ତୁ’ ବୋଲି ନିର୍ଦ୍ଦେଶ ଦେଇଥିଲେ।
ସୁପ୍ରିମକୋର୍ଟ ବାର୍ ଆସୋସିଏସନ୍ର ସଭାପତି ବିକାଶ ସିଂହ ଓକିଲ ସଂଘର ଓକିଲଙ୍କ ଚାମ୍ବର ପାଇଁ ଜମି ଆବଣ୍ଟନ ମାମଲାରେ ଏକ ଆବେଦନ ଉପରେ ଶୁଣାଣି ପାଇଁ ଚାପ ପକାଉଥିଲେ। ଏଥିରେ ପ୍ରଧାନ ବିଚାରପତି କ୍ଷୁବ୍ଧ ହୋଇ କହିଲେ, ‘ଚୁପ୍ ରହନ୍ତୁ ! ବର୍ତ୍ତମାନ ଏହି ଅଦାଲତ ଛାଡ଼ି ଚାଲିଯାଆନ୍ତୁ !’
ମାମଲାର ଶୁଣାଣି ସମୟରେ ଏସସିବିଏ ସଭାପତି ପ୍ରଧାନ ବିଚାରପତିଙ୍କ ସହ ଜଷ୍ଟିସ ପିଏସ୍ ନରସିଂହ ଏବଂ ଜଷ୍ଟିସ ଜେବି ପର୍ଦିୱାଲାଙ୍କୁ ନେଇ ଗଠିତ ଖଣ୍ଡପୀଠଙ୍କୁ କହିଥିଲେ, ‘ଗତ ୬ ମାସ ଧରି ଏହି ମାମଲାକୁ ତାଲିକାଭୁକ୍ତ କରିବା ପାଇଁ ସଂଘର୍ଷ କରୁଛି। ଯଦି ଏହା କରା ନଯାଏ, ତେବେ ମୋତେ ଆହୁରି ଆଗକୁ ବଢିବାକୁ ପଡିବ ଏବଂ ଏହାକୁ ଆପଣଙ୍କ (ବିଚାରପତି)ଙ୍କ ବାସଭବନକୁ ଯିବାକୁ ପଡିବ। ମୁଁ ଚାହୁଁନାହିଁ ଯେ ବାର୍କୁ ଏଭଳି ଭାବେ ଗ୍ରହଣ କରାଯାଉ।’
ଏହାପରେ ପ୍ରଧାନ ବିଚାରପତି କହିଥିଲେ, ‘ଆପଣ ଏଭଳି ଜମି ମାଗିପାରିବେ ନାହିଁ। ଆମକୁ କହନ୍ତୁ, କେଉଁଦିନ ଆମେ ପୂରା ଦିନ ଖାଲିରେ ବସିରହିଛୁ’।
ଏହାର ଜବାବରେ ସିଂହ କହିଥିଲେ, ‘ମୁଁ କହୁନାହିଁ ଯେ ଆପଣମାନେ ପୂରା ଦିନ ଖାଲି ବସିଛନ୍ତି। ମୁଁ କେବଳ ଏହି ମାମଲାକୁ ତାଲିକାଭୁକ୍ତ କରିବାକୁ ଚେଷ୍ଟା କରୁଛି। ଯଦି ଏହା କରା ନଯାଏ, ତେବେ ମୋତେ ଆହୁରି ଆଗକୁ ବଢିବାକୁ ପଡିବ ଏବଂ ଏହାକୁ ଆପଣଙ୍କ ବାସଭବନକୁ ନେବାକୁ ପଡିବ।
ଏହାଶୁଣି ଚନ୍ଦ୍ରଚୂଡ଼ ଉତ୍ତ୍ୟକ୍ତ ହୋଇ ଚିତ୍କାର କରିଥିଲେ, ‘ମିଷ୍ଟର ବିକାଶ ସିଂହ, ପ୍ରଧାନ ବିଚାରପତିଙ୍କୁ ଧମକ ଦିଅନ୍ତୁ ନାହିଁ। ଏହା କ’ଣ ଆଚରଣ କରିବାର ଶୈଳୀ? ଦୟାକରି ବସି ଯାଆନ୍ତୁ। ଏହାକୁ ଏଭଳି ତାଲିକାଭୁକ୍ତ କରାଯିବ ନାହିଁ। ଦୟାକରି ମୋ କୋର୍ଟ ଛାଡି ଦିଅନ୍ତୁ। ମୁଁ ଏଭଳି ତାଲିକା କରିବି ନାହିଁ। ମୁଁ ଆପଣଙ୍କ ଉପରେ ରାଗିବି ନାହିଁ। ଦୟାକରି ଏପରି ଉଚ୍ଚ ସ୍ୱର କଥାବାର୍ତ୍ତା କରନ୍ତୁ ନାହିଁ। ଜଣେ ସଭାପତି ଭାବରେ, ଆପଣ ବାର୍ର ପରାମର୍ଶଦାତା ଏବଂ ନେତା ହେବା ଉଚିତ୍। ମୁଁ ଦୁଃଖିତ, ଆପଣ କଥାବାର୍ତ୍ତାରସ୍ତର ହ୍ରାସ କରୁଛନ୍ତି। ସୁପ୍ରିମ୍ କୋର୍ଟଙ୍କୁ ଆବଣ୍ଟନ କରାଯାଇଥିବା ଜମିକୁ ଚାମ୍ବର ନିର୍ମାଣ ପାଇଁ ବାର୍କୁ ହସ୍ତାନ୍ତର କରାଯାଉ ବୋଲି ଦାବି କରି ଆପଣ ଧାରା ୩୨ ଆଧାରରେ ପିଟିସନ୍ ଦାଖଲ କରିଛନ୍ତି। ଏହା ଆସିବା ପରେ ଆମେ ଏହାର ସମାଧାନ କରିବୁ। ଦୟାକରି ଆପଣଙ୍କୁ ଚାହୁଁଥିବା ରିଲିଫ୍ ଦେବା ପାଇଁ ଆମ ହାତକୁ ମୋଡ଼ିବାକୁ ଚେଷ୍ଟା କରନ୍ତୁ ନାହିଁ। ’
ଏସସିବିଏ ସଭାପତି କହିଛନ୍ତି, ଯଦି ‘ମିଃ ଲର୍ଡ’ ଏହାକୁ ଖାରଜ କରିବାକୁ ଚାହୁଁଛନ୍ତି, ଦୟାକରି କରନ୍ତୁ। କିନ୍ତୁ ଏପରି କରନ୍ତୁ ନାହିଁ। ଏହା ତାଲିକାଭୁକ୍ତ ନୁହେଁ।
ଏହାର ଜବାବରେ ପ୍ରଧାନ ବିଚାରପତି କହିଛନ୍ତି, ମୁଁ ମୋର ରାୟ ଘୋଷଣା କରିଛି। ଏହା ମାର୍ଚ୍ଚ ୧୭ ତାରିଖରେ ଶୁଣାଯିବ ଏବଂ ଏହା ସିରିୟଲ ନମ୍ବର ୧ରେ ତାଲିକାଭୁକ୍ତ ହେବ ନାହିଁ।
ବରିଷ୍ଠ ଓକିଲ ସିଂହ କହିଛନ୍ତି ଯେ ବାର୍ ସର୍ବଦା ଅଦାଲତକୁ ସମର୍ଥନ କରିଛି। ମୁଁ କେବେ ବି ଅଯଥା କଥା କହିବାକୁ ଚାହେଁ ନାହିଁ କିନ୍ତୁ ଏହି ମାମଲାରେ ମୁଁ ଏପରି କରିବାକୁ ବାଧ୍ୟ ହେଉଛି।
ଏହାପରେ ବିକାଶ ସିଂହଙ୍କୁ ଜଷ୍ଟିସ ଚନ୍ଦ୍ରଚୂଡ଼ କହିଥିଲେ, ମୁଁ ପ୍ରଧାନ ବିଚାରପତି। ୨୦୦୦ ମାର୍ଚ୍ଚ ୨୯ରୁ ମୁଁ ଏଠାରେ ଅଛି। ମୁଁ ୨୨ ବର୍ଷ ହେବ ଏହି ବୃତ୍ତିରେ ଅଛି। ବାର୍ର ଜଣେ ସଦସ୍ୟ, ଆବେଦନକାରୀ କିମ୍ବା ଅନ୍ୟ କାହା ଦ୍ୱାରା ମୁଁ ନିଜକୁ କେବେ ବି ଅସନ୍ତୁଷ୍ଟ ହେବାକୁ ଦେଇନାହିଁ। ମୁଁ ମୋ କ୍ୟାରିୟରର ଶେଷ ଦୁଇ ବର୍ଷରେ ଏହା କରିବି ନାହିଁ।
ଏହାପରେ ପ୍ରଧାନ ବିଚାରପତି କହିଥିଲେ, ଦୟାକରି କୋର୍ଟ ରୁମ୍ ବାହାରେ ନିଜର ଏଜେଣ୍ଡାକୁ ସମାଧାନ କରନ୍ତୁ ଏବଂ ପରବର୍ତ୍ତୀ ମାମଲାକୁ ବିଚାର ପାଇଁ ଡାକିଥିଲେ। ପରବର୍ତ୍ତୀ ମାମଲାର ଶୁଣାଣି ସରିବା ପରେ ଶିବସେନା ମାମଲାପାଇଁ କୋର୍ଟରେ ଉପସ୍ଥିତ ଥିବା ବରିଷ୍ଠ ଆଇନଜୀବୀ କପିଲ ସିବଲ ବାର୍ ପକ୍ଷରୁ ଖଣ୍ଡପୀଠଙ୍କୁ କ୍ଷମା ପ୍ରାର୍ଥନା କରିବା ସହ କହିଛନ୍ତି, ଆଜି ସକାଳେ ଯାହା ଘଟିଛି ସେଥିପାଇଁ ମୁଁ ଦୁଃଖିତ। ମୁଁ କ୍ଷମା ପ୍ରାର୍ଥନା କରୁଛି। ସେଠାରେ ଏକ ଲକ୍ଷ୍ମଣ ରେଖା ଅଛି ଯାହାକୁ ଆମେ କେହି ଅତିକ୍ରମ କରିବା ଉଚିତ୍ ନୁହେଁ। ମୁଁ ଭାବୁନାହିଁ ଯେ ବାର୍ ଶୃଙ୍ଖଳାର ସୀମା ଅତିକ୍ରମ କରିବା ଉଚିତ।