ପ୍ରେମିକାଙ୍କ ‘ବ୍ୟକ୍ତିଗତ ମୁହୂର୍ତ୍ତ’ ଭାଇରାଲ୍, ଓଡ଼ିଶାରେ ଥାଇ ମିଡିଆ ଉପରେ ବର୍ଷିଲେ ହାର୍ଦ୍ଦିକ ପାଣ୍ଡ୍ୟା
ଭୁବନେଶ୍ୱର, ଭାରତୀୟ କ୍ରିକେଟ୍ ଦଳର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା ନିଜ ପ୍ରେମିକା ମହିକା ଶର୍ମାଙ୍କ ଭିଡିଓ ଏବଂ ଫଟୋ ଅନୁଚିତ ଆଙ୍ଗେଲ୍ରେ ଉଠାଇଥିବା ପାପାରାଜିଙ୍କ ଉପରେ ସୋସିଆଲ ମିଡିଆରେ କ୍ଷୋଭ ପ୍ରକାଶ କରିଛନ୍ତି। ସେ ଏହାକୁ ‘ଅପମାନଜନକ’ ଏବଂ ‘ବ୍ୟକ୍ତିଗତ ଜୀବନରେ ହସ୍ତକ୍ଷେପ’ ବୋଲି କହିବା ସହ ଉକ୍ତ ଘଟଣାକୁ ନେଇ କଡ଼ା ନିନ୍ଦା କରିଛନ୍ତି।ହାର୍ଦ୍ଦିକ ପାଣ୍ଡ୍ୟା ଇନଷ୍ଟାଗ୍ରାମ ଷ୍ଟୋରୀରେ ଲେଖିଛନ୍ତି ଯେ, ସେ ଜାଣିଛନ୍ତି ସାର୍ବଜନୀନ ଜୀବନରେ ଧ୍ୟାନ ଏବଂ ସମୀକ୍ଷା ରହିଥାଏ, କିନ୍ତୁ ଆଜି ଯାହା ଘଟିଛି ତାହା ସବୁ ସୀମା ଟପି ଯାଇଛି। ସେ କହିଛନ୍ତି, “ମହିକା ବାନ୍ଦ୍ରାର ଏକ ରେଷ୍ଟୁରାଣ୍ଟରୁ ସିଡ଼ିରେ ଓହ୍ଲାଉଥିବା ବେଳେ ପାପାରାଜିମାନେ ତାଙ୍କର ଏପରି ଏକ ଆଙ୍ଗେଲରୁ ଫଟୋ ଉଠାଇବାକୁ ସ୍ଥିର କଲେ, ଯେଉଁଥିରେ କୌଣସି ମହିଳାଙ୍କୁ ଫଟୋଗ୍ରାଫ୍ କରାଯିବା ଉଚିତ୍ ନୁହେଁ। ଏକ ବ୍ୟକ୍ତିଗତ ମୁହୂର୍ତ୍ତକୁ ଶସ୍ତା ସେନ୍ସେସନ୍ରେ ପରିଣତ କରାଗଲା।”ନିଜ ପୋଷ୍ଟରେ ହାର୍ଦ୍ଦିକ ସମସ୍ତଙ୍କ ପାଇଁ କିଛି ସୀମା ରହିବା ଉଚିତ୍ ବୋଲି କହିଛନ୍ତି। ସେ ଗଣମାଧ୍ୟମ କର୍ମଚାରୀଙ୍କ ପରିଶ୍ରମକୁ ସମ୍ମାନ ଜଣାଇବା ସହ ଅନୁରୋଧ କରିଛନ୍ତି ଯେ ସମସ୍ତେ ସାମାନ୍ୟ ଅଧିକ ବିଚାରଶୀଳ ହୁଅନ୍ତୁ।ସେ ଆହୁରି ମଧ୍ୟ ଲେଖିଛନ୍ତି, “ଏହା କେବଳ ଖବର କିମ୍ବା କିଏ କ୍ଲିକ୍ କଲା ତାହା ବିଷୟରେ ନୁହେଁ, ଏହା ମୌଳିକ ସମ୍ମାନ ବିଷୟରେ। ମହିଳାମାନେ ସମ୍ମାନର ଅଧିକାରୀ। ସମସ୍ତେ ସୀମାବଦ୍ଧତାର ଅଧିକାରୀ।”ସେ ଶେଷରେ କହିଛନ୍ତି, “ସବୁକିଛି କ୍ୟାପଚର କରିବାର ଆବଶ୍ୟକତା ନାହିଁ। ପ୍ରତ୍ୟେକ ଆଙ୍ଗେଲରୁ ଫଟୋ ଉଠାଇବାର ଆବଶ୍ୟକତା ନାହିଁ। ଆସନ୍ତୁ ଏହି ଖେଳରେ କିଛି ମାନବିକତା ରଖିବା।”ସୂଚନାଯୋଗ୍ୟ ଯେ, ମଡେଲ୍ ଏବଂ ଯୋଗ ଟ୍ରେନର ମହିକା ଶର୍ମାଙ୍କ ସହ ନିଜ ସମ୍ପର୍କକୁ ହାର୍ଦ୍ଦିକ ଗତ ଅକ୍ଟୋବର ୨୦୨୫ରେ ସାର୍ବଜନୀନ କରିଥିଲେ। ସେ ନିଜ ଜୀବନର ‘ତିନୋଟି ପ୍ରାଥମିକତା’ ମଧ୍ୟରେ କ୍ରିକେଟ୍ ଏବଂ ପୁଅ ଅଗସ୍ତ୍ୟଙ୍କ ସହିତ ମହିକାଙ୍କୁ ମଧ୍ୟ ସ୍ଥାନ ଦେଇଛନ୍ତି।