ଇରାନ ଅଭିମୁଖେ ଆମେରିକାର ଯୁଦ୍ଧ ଜାହାଜ; ସବୁ ଧ୍ବଂସ କରିଦେବେ
ନୂଆଦିଲ୍ଲୀ, : ଇରାନ ଅଭିମୁଖେ ଦ୍ରୁତ ଗତିରେ ଯାଉଛି ଆମେରିକା ଯୁଦ୍ଧ ଜାହାଜ। ବଢୁଥିବା ଉତ୍ତେଜନାକୁ ଦୃଷ୍ଟିରେ ରଖି ଆମେରିକା ପ୍ରତିରକ୍ଷା ମୁଖ୍ୟାଳୟ ‘ପେଣ୍ଟାଗନ୍’ ଏକ ବଡ଼ ପଦକ୍ଷେପ ଗ୍ରହଣ କରିଛି। ଦକ୍ଷିଣ ଚାଇନା ସାଗରରେ ମୁତୟନ ଥିବା ଆମେରିକାର ଏକ ଶକ୍ତିଶାଳୀ ‘କ୍ୟାରିଅର୍ ଷ୍ଟ୍ରାଇକ୍ ଗ୍ରୁପ୍’କୁ ବର୍ତ୍ତମାନ ମଧ୍ୟପ୍ରାଚ୍ୟ ଅଭିମୁଖେ ପଠାଯାଇଛି। ଆମେରିକାର ସେଣ୍ଟ୍ରାଲ୍ କମାଣ୍ଡ ଅଧୀନରେ ଥିବା ଏହି ଅଞ୍ଚଳରେ ଟ୍ରମ୍ପ ପ୍ରଶାସନ ଏବଂ ଇରାନ ମଧ୍ୟରେ ସୃଷ୍ଟି ହୋଇଥିବା ବିବାଦ ଯୋଗୁଁ ଏହି ସାମରିକ ପଦକ୍ଷେପ ନିଆଯାଇଛି।ସୂଚନା ଅନୁଯାୟୀ, ଆମେରିକାର ପରମାଣୁ ଶକ୍ତି ସମ୍ପନ୍ନ ବିମାନବାହୀ ଯୁଦ୍ଧ ଜାହାଜ ‘ୟୁଏସଏସ୍ ଆବ୍ରାହମ ଲିଙ୍କନ’ ନେତୃତ୍ୱରେ ଏକ ବିଶାଳ ନୌସେନା ଦଳ ମଧ୍ୟପ୍ରାଚ୍ୟକୁ ଯାଉଛି। ଏହି ଗ୍ରୁପ୍ରେ ଏକାଧିକ ଯୁଦ୍ଧ ଜାହାଜ ସମେତ ଅତିକମରେ ଗୋଟିଏ ଆଟାକ୍ ସବମରିନ୍ ମଧ୍ୟ ରହିଛି। ଏହି ଯୁଦ୍ଧ ଜାହାଜଗୁଡ଼ିକ ଆସନ୍ତା ପ୍ରାୟ ଏକ ସପ୍ତାହ ମଧ୍ୟରେ ନିର୍ଦ୍ଧାରିତ ସ୍ଥାନରେ ପହଞ୍ଚିବେ ବୋଲି ଆଶା କରାଯାଉଛି।ଇରାନରେ ବର୍ତ୍ତମାନ ଆକାଶଛୁଆଁ ମୁଦ୍ରାସ୍ଫୀତି, ଆର୍ଥିକ ସଙ୍କଟ ଏବଂ ଶାସନ ବ୍ୟବସ୍ଥା ବିରୋଧରେ ବ୍ୟାପକ ସରକାର ବିରୋଧୀ ଆନ୍ଦୋଳନ ଜାରି ରହିଛି। ଆନ୍ଦୋଳନକାରୀଙ୍କୁ ସମର୍ଥନ କରିବା ନେଇ ୱାଶିଂଟନରେ ଆଲୋଚନା ଚାଲିଥିବା ବେଳେ ଏହି ନୌସେନା ମୁତୟନ ଇରାନ ପାଇଁ ଏକ ବଡ଼ ସତର୍କବାଣୀ ବୋଲି କୁହାଯାଉଛି। ଇରାନର ଏହି ବିକ୍ଷୋଭ ଏବେ ୧୮ ଦିନରେ ପହଞ୍ଚିଥିବା ବେଳେ, ମାନବାଧିକାର ସଂଗଠନ (HRANA) ଅନୁଯାୟୀ, ଏହି ହିଂସାରେ ଏପର୍ଯ୍ୟନ୍ତ ୨,୬୧୫ ଜଣଙ୍କର ମୃତ୍ୟୁ ହୋଇସାରିଛି ଏବଂ ୧୮,୪୭୦ ରୁ ଅଧିକ ଲୋକ ଗିରଫ ହୋଇଛନ୍ତି।ଆମେରିକାର ଏହି ସାମରିକ ପ୍ରସ୍ତୁତି ମଧ୍ୟରେ କାତାରରେ ଥିବା ଆମେରିକାର ସବୁଠାରୁ ବଡ଼ ସାମରିକ ବେସ୍ ‘ଅଲ୍ ଉଦେଇଦ୍’ରୁ କିଛି କର୍ମଚାରୀଙ୍କୁ ସୁରକ୍ଷା ଦୃଷ୍ଟିରୁ ସେଠାରୁ ଚାଲିଯିବାକୁ ପରାମର୍ଶ ଦିଆଯାଇଛି। ସେହିପରି ସାଉଦି ଆରବରେ ଥିବା ଆମେରିକୀୟ ଦୂତାବାସ ମଧ୍ୟ ନିଜ କର୍ମଚାରୀଙ୍କୁ ଅତି ସତର୍କ ରହିବାକୁ ଏବଂ ଅନାବଶ୍ୟକ ଯାତ୍ରା ନକରିବାକୁ ନିର୍ଦ୍ଦେଶ ଦେଇଛି।ସିବିଏସ୍ ନ୍ୟୁଜ୍ ଅନୁଯାୟୀ, ଗତ ସୋମବାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଇରାନ ବିରୋଧରେ ବ୍ୟବହାର କରାଯାଇପାରୁଥିବା ସାମରିକ, ସାଇବର ଏବଂ ମନସ୍ତାତ୍ତ୍ୱିକ କାର୍ଯ୍ୟାନୁଷ୍ଠାନ ସମ୍ପର୍କରେ ସବିଶେଷ ବିବରଣୀ ଦିଆଯାଇଛି। ଇରାନ ଯଦି ବିକ୍ଷୋଭକାରୀଙ୍କ ବିରୋଧରେ କଠୋର ପଦକ୍ଷେପ ନିଏ, ତେବେ ଆମେରିକା ପକ୍ଷରୁ କଡ଼ା ଜବାବ ଦିଆଯାଇପାରେ।