ଶେଖ ହାସିନାଙ୍କୁ ତୁରନ୍ତ ପ୍ରତ୍ୟର୍ପଣ କରିବାକୁ ବାଂଲାଦେଶର ଦାବି

ଢାକା, : ଅନ୍ତର୍ଜାତୀୟ ଅପରାଧ ଟ୍ରିବ୍ୟୁନାଲ୍ (ICT) ପୂର୍ବତନ ପ୍ରଧାନମନ୍ତ୍ରୀ ଶେଖ ହାସିନାଙ୍କୁ ମୃତ୍ୟୁଦଣ୍ଡ ଶୁଣାଇବା ପରେ ବାଂଲାଦେଶ ସୋମବାର ତାଙ୍କୁ ତୁରନ୍ତ ଭାରତକୁ ହସ୍ତାନ୍ତର କରିବାକୁ ଆନୁଷ୍ଠାନିକ ଭାବେ ଦାବି କରିଛି। ଢାକା କହିଛି ଯେ ଦ୍ୱିପାକ୍ଷିକ ପ୍ରତ୍ୟର୍ପଣ ଚୁକ୍ତି ଅନୁଯାୟୀ ନୂଆଦିଲ୍ଲୀ ଏହା କରିବାକୁ ବାଧ୍ୟ ଅଟେ।ICT, ଗତ ବର୍ଷ ହୋଇଥିବା ଦେଶବ୍ୟାପୀ ଛାତ୍ର ବିଦ୍ରୋହ ଉପରେ ହିଂସାତ୍ମକ ଦମନରେ ଶେଖ ହାସିନାଙ୍କ କଥିତ ଭୂମିକା ପାଇଁ ତାଙ୍କୁ ଦୋଷୀ ସାବ୍ୟସ୍ତ କରିଛି। ବୈଦେଶିକ ବ୍ୟାପାର ମନ୍ତ୍ରଣାଳୟ ଏକ ପ୍ରେସ୍ ବିବୃତ୍ତିରେ କହିଛି ଯେ ହାସିନା ଗତ ଜୁଲାଇ ମାସରେ ହୋଇଥିବା ହତ୍ୟାକାଣ୍ଡ ସହ ଜଡିତ “ମାନବିକତା ବିରୋଧୀ ଅପରାଧ” ପାଇଁ ଦୋଷୀ ସାବ୍ୟସ୍ତ ହୋଇଛନ୍ତି।ଅଶାନ୍ତି ସମୟରେ ଦେଶରୁ ପଳାଇ ଯାଇଥିବା ହାସିନା ଭାରତରେ ଆଶ୍ରୟ ନେଇଥିବା ଢାକା ପକ୍ଷରୁ କୁହାଯାଇଛି। ମନ୍ତ୍ରଣାଳୟ ଚେତାବନୀ ଦେଇଛି ଯେ, ଯେକୌଣସି ଦେଶ ତାଙ୍କୁ ଆଶ୍ରୟ ଦେଲେ ତାହା “ଏକ ଅତ୍ୟନ୍ତ ଅବନ୍ଧୁତ୍ୱପୂର୍ଣ୍ଣ କାର୍ଯ୍ୟ ଏବଂ ନ୍ୟାୟ ପ୍ରତି ଅବମାନନା” ହେବ।ମନ୍ତ୍ରଣାଳୟ କହିଛି, “ଭାରତ ସରକାର ତୁରନ୍ତ ଏହି ଦୁଇ ଦୋଷୀ ବ୍ୟକ୍ତିଙ୍କୁ ବାଂଲାଦେଶ କର୍ତ୍ତୃପକ୍ଷଙ୍କୁ ହସ୍ତାନ୍ତର କରିବା ଉଚିତ।” ICT ସମାନ ମାମଲାରେ ପୂର୍ବତନ ସ୍ୱରାଷ୍ଟ୍ର ମନ୍ତ୍ରୀ ଅସଦୁଜ୍ଜମାନ ଖାନ କମଲଙ୍କୁ ମଧ୍ୟ ଅନୁପସ୍ଥିତିରେ ବିଚାର କରି ମୃତ୍ୟୁଦଣ୍ଡ ଦେଇଛନ୍ତି। ଢାକା ଉଭୟ ହାସିନା ଏବଂ କମଲଙ୍କୁ ବିଳମ୍ବ ନକରି ପ୍ରତ୍ୟର୍ପଣ କରିବାକୁ ଦାବି କରିଛି, ଯାହାକୁ ପ୍ରଚଳିତ ଚୁକ୍ତି ଅନୁଯାୟୀ “ବାଧ୍ୟତାମୂଳକ କର୍ତ୍ତବ୍ୟ” ବୋଲି ଦର୍ଶାଇଛି।ଏହି ଦାବି ଭାରତ ଉପରେ ଗୁରୁତ୍ୱପୂର୍ଣ୍ଣ କୂଟନୈତିକ ଚାପ ସୃଷ୍ଟି କରିବାର ସମ୍ଭାବନା ଅଛି। ଏହି ରାୟ କିମ୍ବା ଢାକାର ପ୍ରତ୍ୟର୍ପଣ ଦାବି ଉପରେ ନୂଆଦିଲ୍ଲୀ ଏପର୍ଯ୍ୟନ୍ତ କୌଣସି ମନ୍ତବ୍ୟ ଦେଇ ନାହିଁ।